لاہور : وزیراعلیٰ پنجاب مریم نواز نے عالمی یوم صحت کے موقع پر اپنے پیغام میں کہا کہ پنجاب میں "صحت مند پنجاب" وژن کے تحت جامع ہیلتھ ریفارمز کا آغاز کر دیا گیا ہے۔ انہوں نے عوام کو صحت اور علاج کی بہترین سہولتیں فراہم کرنے کے عزم کا اعادہ کرتے ہوئے بتایا کہ فیلڈ ہسپتالوں کے ذریعے لاکھوں مریضوں کو چند ماہ میں گھر کی دہلیز پر علاج کی سہولت فراہم کی جارہی ہے۔
مریم نواز نے مزید کہا کہ پنجاب میں پہلی بار 1250 صحت مراکز کو جدید کلینکس میں تبدیل کیا جا رہا ہے، اور عوام کو ان کے گھروں تک ادویات کی فراہمی کو یقینی بنایا جا رہا ہے۔ ان مراکز میں بنیادی صحت کی سہولتوں سے بہتر خدمات فراہم کی جا رہی ہیں۔
وزیراعلیٰ نے کہا کہ بڑے ہسپتالوں میں علاج، طبی ٹیسٹ اور ادویات کی فراہمی کے لئے مؤثر اقدامات کیے جا رہے ہیں۔ انہوں نے بتایا کہ پنجاب میں پاکستان کا پہلا سرکاری کینسر ہسپتال اور سرگودھا میں کارڈیالوجی انسٹیٹیوٹ جلد فعال ہو جائیں گے۔
مریم نواز نے چیف منسٹر چلڈرن ہارٹ سرجری پروگرام اور ٹرانسپلانٹ کارڈ کی متعارف کرائی جانے والی خدمات کا ذکر بھی کیا اور پسماندہ علاقوں سے ایمرجنسی مریضوں کے لئے ایئر ایمبولینس سروس شروع کرنے کا اعلان کیا۔ ان کا کہنا تھا کہ عالمی یوم صحت صحت کے مسائل پر رائے عامہ اور فیصلہ سازوں کی توجہ مرکوز کرتا ہے۔
وزیراعلیٰ نے مزید کہا کہ 2025 کا عالمی یوم صحت کا تھیم "صحت مند آغاز، پر امید مستقبل" ہے، جس کا مقصد زچہ اور بچہ کی صحت اور سلامتی کو بہتر بنانا ہے۔ انہوں نے یہ بھی کہا کہ صحت مند طرز زندگی کے بارے میں شعور بیدار کرنا ضروری ہے تاکہ صحت اور معیار زندگی کو بہتر بنایا جا سکے۔
مریم نواز نے کہا کہ صحت مند آبادی ہی خوشحال اور پرامن معاشرت کی بنیاد ہے، اور عالمی یوم صحت اچھی صحت کو برقرار رکھنے کی اہمیت کو یاد دہانی کراتا ہے۔