غزہ : غزہ سے مقبوضہ فلسطینی علاقوں کی جانب 10 راکٹ داغے جانے کی اطلاعات ہیں، جس کے نتیجے میں مقبوضہ عسقلان میں نقصانات ہوئے ہیں۔ اسرائیلی میڈیا کے مطابق یہ حملہ گزشتہ 10 ماہ میں غزہ سے ہونے والا سب سے بڑا راکٹ حملہ ہے۔ فلسطینی مزاحمتی تنظیم حماس کے عسکری ونگ، القسام بریگیڈز نے اس حملے کی ذمہ داری قبول کی ہے۔
اسرائیلی فوج نے کہا کہ غزہ سے داغے گئے اکثر راکٹوں کو فضا میں ہی تباہ کر دیا گیا۔ تاہم، اسرائیلی میڈیا کی جاری کردہ تصاویر اور ویڈیوز میں عسقلان شہر میں راکٹ گرنے کے بعد تباہ شدہ گاڑیوں کے مناظر دیکھے جا سکتے ہیں۔ اسرائیل کی ریسکیو سروس کے مطابق اس حملے میں 3 افراد زخمی ہوئے ہیں۔
اس حملے سے چند روز قبل، 18 مارچ کو اسرائیلی فوج نے غزہ کے خلاف جنگ بندی معاہدہ توڑتے ہوئے بمباری کا آغاز کیا تھا۔ اس کے نتیجے میں 18 مارچ سے اب تک غزہ میں 1,000 سے زائد افراد شہید ہو چکے ہیں۔ اس دوران، 7 اکتوبر 2023 سے اسرائیلی حملوں میں شہید ہونے والے فلسطینیوں کی تعداد 50,000 سے تجاوز کر چکی ہے۔
