بنوں: آرمی چیف جنرل سید عاصم منیر نے کہا ہے کہ خوارج اور ان کے سہولتکاروں کے خلاف جنگ اپنے منطقی انجام تک جاری رہے گی۔ بنوں کے دورے پر پہنچنے پر انہوں نے 4 مارچ کو بنوں کینٹ پر ہونے والے خوارج کے ناکام دہشت گرد حملے کے حوالے سے سکیورٹی فورسز کی کارروائی پر بریفنگ لی۔ اس دوران، انہوں نے سی ایم ایچ بنوں کا بھی دورہ کیا اور زخمی جوانوں کی حالت کے بارے میں دریافت کیا۔
آرمی چیف نے حملے میں شہید ہونے والے معصوم شہریوں کے اہل خانہ سے اظہار تعزیت کرتے ہوئے کہا کہ پاکستان آرمی دہشت گردی کے خلاف اپنے عزم میں پختہ ہے اور ریاست کی سلامتی کے لیے ہر سطح پر لڑے گی۔
جنرل سید عاصم منیر کا کہنا تھا کہ دہشت گردوں کو فوراً ان کے انجام تک پہنچایا گیا اور ان کے سہولتکاروں کو جلد ہی انصاف کے کٹہرے میں لایا جائے گا، چاہے وہ کہیں بھی ہوں۔ انہوں نے مزید کہا کہ خوارج اور ان کے حمایت یافتہ عناصر پاکستان کی ترقی اور امن کے دشمن ہیں۔
آرمی چیف نے سکیورٹی فورسز کی فوری اور مؤثر کارروائی کی تعریف کی اور مقامی کمیونٹی کی دہشت گردی کے خلاف جنگ میں اہمیت پر زور دیا۔ انہوں نے کہا کہ خوارج کے دہشت گرد گروہ پاکستانی سرزمین پر انتشار پھیلانے کے لیے افغان سرزمین کا استعمال کر رہے ہیں۔
