راولپنڈی : پاک بحریہ کے جہاز "اصلت" نے انڈونیشیا میں کثیر القومی بحری مشق "کموڈو-25" میں شرکت کی، جس میں 38 ممالک کی بحری افواج نے حصہ لیا۔ پاک فوج کے شعبہ تعلقات عامہ (آئی ایس پی آر) کے مطابق یہ مشق بین الاقوامی سطح پر بحری صلاحیتوں کے مظاہرے اور تعاون کو فروغ دینے کا ایک اہم موقع ہے۔
مشق کا آغاز فلیٹ ریویو سے ہوا، جس میں پی این ایس اصلت نے دیگر جنگی جہازوں کے ساتھ باہمی تعاون اور اپنی بحری صلاحیتوں کا مظاہرہ کیا۔ اس موقع پر پاک بحریہ کی فعال شرکت نے علاقائی امن و استحکام کے لیے اس کے عزم کو واضح کیا۔
آئی ایس پی آر کے مطابق، پی این ایس اصلت نے کولمبو، سری لنکا کا بھی دورہ کیا، جہاں کمانڈنگ آفیسر نے کمانڈر ویسٹرن نیول ایریا اور دیگر فوجی حکام سے ملاقاتیں کیں۔ پاک بحریہ کے جہاز کو ریجنل میری ٹائم سکیورٹی پٹرول پر باقاعدگی سے تعینات کیا جاتا ہے، اور پی این ایس اصلت کا سری لنکا اور انڈونیشیا کا دورہ دونوں دوست ممالک کے ساتھ بحری تعاون کو مزید فروغ دینے میں اہم کردار ادا کرے گا۔