نیویارک : آج دنیا بھر میں بچوں اور بڑوں کی پسندیدہ شخصیت، مسٹر بین، یعنی روون اٹکنسن کی 70ویں سالگرہ منائی جارہی ہے۔ اپنی لاجواب حرکتوں اور بے مثل انداز میں سب کو ہنسانے والے اٹکنسن نے صرف مسٹر بین کا کردار ہی نہیں نبھایا، بلکہ اپنی سنجیدہ اداکاری سے بھی شائقین کی دلوں میں جگہ بنائی۔
روون اٹکنسن نے ہالی ووڈ میں 50 کے قریب کردار ادا کیے ہیں اور ہر کردار میں اپنی اداکاری سے لوگوں کا دل جیتا ہے۔ دلچسپ بات یہ ہے کہ مسٹر بین نے آکسفورڈ یونیورسٹی سے الیکٹریکل انجینئرنگ کی ڈگری حاصل کی ہے، یعنی حقیقی زندگی میں وہ ایک انجینئر ہیں۔
مسٹر بین کی سب سے بڑی محبت ان کی زرد کار ہے، جسے وہ فلموں میں کئی منفرد انداز میں استعمال کرتے ہیں۔ تاہم، حقیقت میں بھی روون اٹکنسن کو گاڑیوں کا بے حد شوق ہے اور ان کے پاس کئی بیش قیمت گاڑیاں موجود ہیں۔ برطانوی شاہی خاندان سے بھی ان کے قریبی تعلقات ہیں اور وہ اکثر شہزادہ چارلس کی اہلیہ کمیلا پارکر کے ساتھ محفلوں میں نظر آتے ہیں۔ اس کے علاوہ، وہ شہزادہ ولیم اور کیٹ مڈلٹن کی شادی میں بھی بطور مہمان شریک ہوئے تھے۔
روون اٹکنسن کی اہلیہ، سنیترا سستری، برطانوی نشریاتی ادارے بی بی سی میں میک اپ آرٹسٹ کے طور پر کام کرچکی ہیں، لیکن 2014 میں دونوں کے درمیان علیحدگی ہوگئی۔ مسٹر بین کی ایک بیٹی، للی اٹکنسن بھی ہیں، جو نہ صرف ایک گلوکارہ اور سونگ رائٹر ہیں بلکہ اپنے والد کے ساتھ کئی فلموں میں بھی کام کرچکی ہیں۔ آج مسٹر بین کی 70ویں سالگرہ پر دنیا بھر کے مداح ان کی کامیاب زندگی اور بے شمار کامیاب کرداروں کو یاد کرتے ہیں۔
