سیالکوٹ:سری لنکن منیجر کو کس طرح قتل کیا گیا ،پولیس نے بالآخر اہم سی سی ٹی وی فوٹیجز حاصل کر لیں جس میں دیکھا جا سکتا ہے کہ سری لنکن منیجر پہلی فوٹیج میں مشین کے قریب لگے سٹیکر کو ہٹا رہا ہے جس پر تنازع نے جنم لیا ۔
نمائندہ نیو نیوز کے مطابق سری لنکن منیجر کو دیکھا جا سکتا ہے کہ وہ مشین کے اوپر لگے سٹیکر کو ہٹا رہا ہے جبکہ اس وقت سری لنکن منیجر کے قریب دو فیکٹری ملازم بھی کھڑے ہیں ،پولیس کا کہنا ممکنہ طور پر ان دونوں نے یہ خبر فیکٹری میں پھیلائی ہو جس کے بعد یہ افسوسناک ہنگامہ شروع ہو ا ۔
فوٹیج میں دیکھا جا سکتا ہے جیسے ہی سری لنکن منیجر نے سٹیکر اُتارا اس کے بعد فیکٹری کے چند ملازمین کیساتھ اس کی تکرار شروع ہوئی جس کی فوٹیج تاحال پولیس کو نہیں مل سکی ،پولیس ذرائع کا کہنا ہے فیکٹری کے اندر کی چند ایک ویڈیوز ابھی بھی غائب ہیں جن کو دیکھ کر اصل معاملہ کا اندازہ لگا یا جا سکتا ہے ۔
پولیس حکام کا کہنا ہے سری لنکن منیجر کے ساتھ فیکٹری کے نچلے حصے میں جو کچھ ہوا اس کی فوٹیج تاحال ان کو نہیں مل سکی لیکن وہ پوری کوشش کر رہے ہیں کہ وہ فوٹیج بھی ان کو مل جائے جس کو دیکھنے کے بعد دودھ کا دودھ اور پانی کا پانی ہو جائے گا ۔
تیسری فوٹیج میں دیکھا جاسکتا ہے کہ سری لنکن منیجر بھاگ کر اپنی جان بچانے کی کوشش کرتا ہے لیکن کیونکہ فیکٹری میں ہجوم زیادہ اکھٹا ہو گیا تھا اس لیے سری لنکن منیجر نے اسی میں عافیت سمجھی کہ وہ چھت پر جا کر اپنی جان بچا لے لیکن یہ کوشش بھی کام نہ آئی اور سری لنکن منیجر اور اس کے ساتھی کا پیچھا کرتے ہجوم چھت پر بھی آگیا اور منیجر کو مارنا پیٹنا شروع کر دیا ۔
پولیس ذرائع کا کہنا ہے فیکٹری کے نچلے حصے کی دو سے تین فوٹیجز انتہائی اہم ہیں جب سری لنکن منیجر نے سٹیکر اُتارے اور اس کے بعد کن افراد سے اُس کی تکرار ہوئی یہ انتہائی اہم سوال ہے ؟پولیس کے مطابق اگر وہ فوٹیجز مل جائیں تو یہ بات کلیئر ہو جائے گی کہ اصل معاملہ کیا تھا؟