بیجنگ : صدر مملکت آصف علی زرداری نے چینی وزیراعظم لی چیانگ سے ملاقات کی، جس میں دونوں رہنماؤں نے دو طرفہ تعاون کو مزید مستحکم کرنے کا عزم ظاہر کیا۔ یہ ملاقات چین کے گریٹ ہال آف دی پیپلز میں ہوئی، جہاں دونوں رہنماؤں نے مختلف شعبوں میں تعاون کے فروغ پر تبادلہ خیال کیا۔
ملاقات میں پاک چین اقتصادی راہداری (CPEC) کے دوسرے مرحلے پر بھی گفتگو ہوئی، اور دونوں ممالک کے درمیان قابل تجدید توانائی، سائنس و ٹیکنالوجی، انفراسٹرکچر، اور زرعی شعبوں میں تعاون کو مزید بڑھانے پر غور کیا گیا۔ اس کے علاوہ، اقتصادی تعلقات کو مضبوط کرنے کے لیے نجی شعبے اور کاروباری برادری کے درمیان روابط بڑھانے کی ضرورت پر بھی بات چیت ہوئی۔
اس موقع پر نائب وزیراعظم اسحاق ڈار اور وزیراعلیٰ سندھ سید مراد علی شاہ بھی صدر مملکت آصف علی زرداری کے ہمراہ موجود تھے۔ صدر زرداری نے دونوں ممالک کے درمیان پائیدار اور گہری ’’آل ویدر سٹریٹجک کوآپریٹو پارٹنرشپ‘‘ پر بات کرتے ہوئے کہا کہ چین کی مسلسل حمایت ترقیاتی ایجنڈے کے لیے انتہائی اہم ہے اور سی پیک منصوبہ علاقائی روابط اور اقتصادی ترقی کے لیے کلیدی کردار ادا کر رہا ہے۔