کراچی : سعودی عرب، قطر، عمان، موریطانیہ، سینیگال اور ملائیشیا سمیت 10 ممالک سے 48 گھنٹوں میں مزید 139 پاکستانی شہریوں کو بے دخل کردیا گیا۔ امیگریشن ذرائع کے مطابق سعودی عرب میں بلیک لسٹ ، چوری، منشیات، پاسپورٹ کے بغیر اور دیگر الزامات کے تحت 14 افراد کو ڈی پورٹ کیا گیا۔
اس کے علاوہ، انسانی سمگلنگ کا شکار ہونے سے بچائے گئے 3 افراد کو موریطانیہ اور 2 کو سینیگال سے ڈی پورٹ کیا گیا، جنہیں اے ایچ ٹی سی نے حراست میں لے لیا۔ عمان سے 24 شہریوں کو غیرقانونی طور پر ملک میں داخل ہونے پر بے دخل کیا گیا، جن میں سے ایک شہری کا نام بلیک لسٹ میں تھا۔ ان گرفتار شہریوں کو اے ایچ ٹی سی منتقل کیا گیا، جبکہ دیگر 2 کو لاڑکانہ اور لاہور انتظامیہ کے حوالے کیا گیا۔
تاہم عراق میں غیرقانونی طور پر داخل ہونے اور زائد المیعاد قیام پر 34 پاکستانیوں کو بے دخل کیا گیا، جن میں سے 2 کو گوجرانوالہ پولیس کے حوالے کیا گیا۔ امارات میں منشیات، چوری، زائد المیعاد قیام، پاسپورٹ کھونے اور دیگر الزامات کے تحت 31 پاکستانیوں کو ڈی پورٹ کیا گیا۔ملائیشیا میں غیرقانونی امیگریشن پر 8 پاکستانیوں کو واپس بھیجا گیا، جبکہ قطر اور ادیس ابابا سے 9 شہریوں کو رہائشی قوانین کی خلاف ورزی، مفرور ہونے، غیرقانونی کام کرنے یا اجر کی شکایت پر بے دخل کیا گیا ہے۔
