لاہور : محکمہ موسمیات نے پاکستان کے مختلف حصوں میں تیز ہواؤں اور بارش کی پیشگوئی کی ہے۔ ملک کے بیشتر علاقوں میں موسم سرد اور خشک رہنے کا امکان ہے، تاہم بالائی خیبر پختونخوا کے مختلف علاقوں میں بارش ہونے کی توقع ہے۔
آزاد کشمیر اور گلگت بلتستان میں تیز ہواؤں کے ساتھ بارش اور پہاڑوں پر برفباری متوقع ہے۔ اسلام آباد اور اس کے گرد و نواح میں بھی موسم سرد اور خشک رہے گا۔ سندھ اور بلوچستان کے بیشتر علاقوں میں موسم سرد رہے گا، جبکہ مری، گلیات اور اس کے اطراف میں سردی کی شدت برقرار رہے گی۔ چترال، دیر، سوات اور کوہستان میں بارش اور برفباری ہونے کی توقع ہے۔
محکمہ موسمیات کے مطابق لاہور میں کم سے کم درجہ حرارت آٹھ ڈگری سینٹی گریڈ ریکارڈ کیا گیا، جبکہ دن کے اوقات میں زیادہ سے زیادہ درجہ حرارت اکیس ڈگری سینٹی گریڈ رہنے کا امکان ہے۔ علاوہ ازیں، لاہور میں فضائی آلودگی کی شرح میں اضافہ ہو گیا ہے اور شہر دنیا کے آلودہ ترین شہروں کی فہرست میں دوسرے نمبر پر آ گیا ہے، جہاں مجموعی ایئر کوالٹی انڈیکس 241 ریکارڈ کیا گیا۔
