لاہور : وزیراعلیٰ پنجاب مریم نواز شریف نے کھیلوں کے عالمی دن کے موقع پر اپنے پیغام میں کھیلوں کے فروغ کیلئے حکومت پنجاب کی جانب سے تمام ممکنہ وسائل فراہم کرنے کا عزم ظاہر کیا ہے۔
مریم نواز کا کہنا تھا کہ کھیل اور امن کا عالمی دن منانے کا مقصد معاشرتی سطح پر کھیلوں کے مثبت اثرات کو اجاگر کرنا ہے۔ انہوں نے کہا کہ سپورٹس ایونٹس نہ صرف معاشرے میں امن اور ترقی کی راہ ہموار کرتے ہیں بلکہ امن اور کھیل ایک دوسرے کے لیے ضروری ہیں۔ اگر امن ہو گا تو کھیل بھی ہوں گے۔
وزیراعلیٰ پنجاب نے یہ بھی کہا کہ کھیل نوجوانوں میں ٹیم ورک، مسابقت اور برداشت پیدا کرنے میں اہم کردار ادا کرتے ہیں۔ ان کے مطابق پنجاب میں کھیلوں کے فروغ کے لیے "کھیلتا پنجاب" پروگرام کا آغاز کیا گیا ہے، جو نوجوانوں کو کھیلوں میں شرکت کے مواقع فراہم کرے گا۔
مریم نواز نے مزید کہا کہ پنجاب میں پنک گیمز امن اور مساوی ترقی کا نمونہ ہیں، اور حکومت کھیلوں کے انفراسٹرکچر کے قیام پر زور دے رہی ہے۔ اس کے تحت 300 نئے گراؤنڈ اور سپورٹس کمپلیکس بنائے جا رہے ہیں تاکہ نوجوانوں کو کھیل کے بہتر مواقع مل سکیں۔
انہوں نے اس عزم کا بھی اظہار کیا کہ نوجوانوں، معمر افراد، معذور افراد اور پسماندہ علاقوں کے افراد کو سپورٹس کے مساوی مواقع فراہم کیے جائیں گے، اور سپورٹس انڈوومنٹ فنڈز میں مزید اضافہ کیا جائے گا تاکہ کھیلوں کے شعبے کو مزید فروغ دیا جا سکے۔