اسلام آباد : پاکستان کی جانب سے میانمار کے زلزلہ متاثرین کے لیے بھیجی گئی دوسری امدادی کھیپ متعلقہ حکام کے حوالے کر دی گئی ہے۔ ترجمان نیشنل ڈیزاسٹر مینجمنٹ اتھارٹی (این ڈی ایم اے) کے مطابق، وزیر اعظم کی ہدایات پر 70 ٹن امدادی سامان کی بروقت روانگی کو یقینی بنایا گیا۔
اس امدادی کھیپ میں 35 ٹن سامان شامل تھا، جسے یانگون ایئرپورٹ پر میانمار حکام کے حوالے کیا گیا۔ اس موقع پر پاکستان کے سفیر نے یانگون کے وزیر اعلیٰ کو امداد دی۔ یانگون کے وزیر اعلیٰ نے فوری امداد فراہم کرنے پر پاکستان کی حکومت اور عوام کا شکریہ ادا کیا۔
امداد میں تیار کھانا، کمبل، ترپالیں، خیمے، ادویات اور پانی کے ماڈیولز شامل ہیں۔ ترجمان این ڈی ایم اے نے کہا کہ پاکستان اس مشکل وقت میں میانمار کے زلزلہ متاثرین کے ساتھ کھڑا ہے اور ان کی مدد کے لیے ہر ممکن کوششیں جاری رکھے گا۔
