کراچی میں بھاری بل تو آتے ہیں مگر بجلی کئی کئی گھنٹے نہیں آتی،عملے کی ملی بھگت کے بغیر کنڈا سسٹم نہیں چلایا جاسکتا: فاروق ستار

کراچی:ایم کیو ایم پاکستان کے مرکزی رہنما ڈاکٹر فاروق ستار کا کہنا ہے کہ کراچی میں بھاری بل تو آتے ہیں مگر بجلی کئی کئی گھنٹے نہیں آتی،عملے کی ملی بھگت کے بغیر کنڈا سسٹم نہیں چلایا جاسکتا۔کراچی میں مظاہرین سے خطاب کرتے ہوئے ڈاکٹر فاروق ستار نے کہا کہ کراچی میں بھاری بل تو آتے ہیں مگر بجلی کئی کئی گھنٹے نہیں آتی،عملے کی ملی بھگت کے بغیر کنڈا سسٹم نہیں چلایا جاسکتا۔

فاروق ستار کا کہنا تھا کہ کنڈا سسٹم پورے شہر میں پایا جاتا ہے اور اس سسٹم کو چلانے میں کے الیکٹرک کے عملے کا ہاتھ ہے۔ جب تک عملے کے لوگ ملے ہوئے نہ ہوں تب کنڈا سسٹم چلایا ہی نہیں جاسکتا۔

کراچی کے بہت سے نواحی علاقوں میں کنڈا سسٹم بڑے پیمانے پر کام کر رہا ہے۔ کے الیکٹرک ان علاقوں میں بجلی کی چوری سے ہونے والا نقصان باقاعدگی سے بل ادا کرنے والوں سے وصول کرتی ہے۔ بجلی کی چوری عام بلوں میں شامل کردی جاتی ہے۔ کے الیکٹرک کی انتظامیہ ہر حال میں اپنا حساب برابر کرلیتی ہے مگر عوام کو برائے بھی ریلیف نہیں دیتی۔

فاروق ستار کا کہنا تھا کہ ہم نے کئی بار بات کی اور اب کہیں جاکر ایم ڈی کے الیکٹرک کا جواب آیا ہے۔ جب اوپر والے افسران کا یہ حال ہے تو نیچے والوں کا کیا حال ہوگا۔اُن کا کہنا تھا کہ غیراعلانیہ لوڈشیڈنگ کا سلسلہ جاری ہے۔ 48 گھنٹے کی لوڈ شیڈنگ میں بچوں کے امتحانات ہوئے۔ اگر بجلی کے سسٹم کی خرابیاں دور کرنی ہیں تو سردیوں میں دور کرلیا کریں۔