لاہور: انسداد دہشت گردی عدالت لاہور نے 9 مئی کے جلاؤ گھیراؤ کے مقدمات میں بانی پی ٹی آئی عمران خان کے وکیل کو ضمانتوں کی درخواستوں پر دلائل دینے کے لیے آخری موقع دے دیا۔
آج کی سماعت کے دوران اے ٹی سی جج منظر علی گل نے عمران خان کی ضمانت کی درخواستوں پر سماعت کی۔ جب جج صاحب نے درخواست گزار کے وکیل سے دلائل طلب کیے تو جونیئر وکیل نے بتایا کہ سینئر وکیل اسلام آباد میں موجود ہیں۔
اس پر جج منظر علی گل برہم ہوگئے اور ریمارکس دیے کہ "وہ تو روز اسلام آباد ہوتے ہیں، اب بہت ہو چکا، دلائل مکمل کریں۔" جج کے سخت ریمارکس کے بعد عدالت نے عمران خان کے وکیل کو ضمانتوں کی درخواستوں پر دلائل دینے کے لیے آخری موقع دیتے ہوئے کیس کی مزید سماعت 8 نومبر تک ملتوی کر دی۔
