لاہور: سینئر صوبائی وزیر مریم اورنگزیب نے کہا کہ مسلم لیگ ن کی حکومت کا ہر دن عوام کی ترقی اور خوشحالی کی نوید لے کر طلوع ہوا۔
مسلم لیگ ن کی حکومت کو ایک سال مکمل ہونے پر اپنے بیان میں مریم اورنگزیب نے کہا کہ نواز شریف کی رہنمائی میں مسلم لیگ ن کی حکومت کے 365 دن میں ہر لمحہ پاکستان کی ترقی اور عوام کے لیے ریلیف کی خوش خبریاں آئی ہیں۔
انہوں نے کہا کہ وزیر اعظم شہباز شریف کی قیادت میں پاکستان نے مایوسی سے اعتماد، ناامیدی سے امید، انتشار سے استحکام اور ڈیفالٹ سے نجات پا کر معاشی استحکام کی طرف شاندار سفر طے کیا۔
مریم اورنگزیب نے مزید کہا کہ 12 ماہ میں معاشی معجزے رونما ہوئے ہیں، اور مہنگائی کی شرح 38 سے کم ہو کر 1.5 فیصد پر آ گئی جو 9 سال کی کم ترین سطح ہے۔ مسلم لیگ ن کی حکومت میں ہر نیا دن پاکستان کے روشن اور خوشحال مستقبل کے خواب کو حقیقت کے قریب لے آتا ہے۔
