لاہور : آئی سی سی چیمپئنز ٹرافی 2025 کے دوسرے سیمی فائنل میں نیوزی لینڈ نے جنوبی افریقہ کے خلاف ٹاس جیت کر پہلے بیٹنگ کرنے کا فیصلہ کیا ہے۔ یہ میچ لاہور کے قذافی سٹیڈیم میں کھیلا جا رہا ہے، جہاں کیویز کی قیادت مچل سینٹنر کر رہے ہیں، جبکہ پروٹیز کی قیادت ٹیمبا باووما کے ہاتھ میں ہے۔
ٹاس کے بعد نیوزی لینڈ کے کپتان مچل سینٹنر نے کہا کہ وکٹ اچھی نظر آ رہی ہے اور یہاں اوس نہیں پڑتی۔ انہوں نے کہا کہ ہمیں یہاں کی کنڈیشنز کا اندازہ ہے، کیونکہ ہم نے یہاں ٹرائی نیشن سیریز کے میچز کھیلے ہیں۔ سینٹنر کا مزید کہنا تھا کہ گزشتہ میچ میں حالات مختلف تھے، لیکن آج ہم ایک مضبوط ٹیم کے خلاف کھیل رہے ہیں اور ہماری کوشش ہوگی کہ ہم بڑا ٹارگٹ سیٹ کر کے جنوبی افریقہ پر دباؤ ڈال سکیں۔
دوسری جانب، جنوبی افریقی کپتان ٹیمبا باووما نے کہا کہ اگر ہم ٹاس جیتتے تو بیٹنگ کو ترجیح دیتے، تاہم اب ہم اچھا آغاز کرنے کی کوشش کریں گے۔ انہوں نے بتایا کہ ٹیم میں ایک تبدیلی کی گئی ہے اور وہ خود ٹیم میں واپس آ گئے ہیں اور اس وقت خود کو بہتر محسوس کر رہے ہیں۔
جنوبی افریقہ کے اسکواڈ میں ٹیمبا باووما، ریسن وین ڈیر ڈوسن، ایڈن مارکرم، ہینرک کلاسن، ڈیوڈ ملر، ویان مولڈر، مارکو جینسن، کیشو مہاراج، کگیسو ربادا، لنگی نگیڈی، راین رکیلٹن شامل ہیں ۔ جبکہ نیوزی لینڈ کے اسکواڈ میں مچل سینٹنر، ول ینگ، راچن رویندر، کین ولیمسن، ڈیرل مچل، ٹام لیتھم، گلین فلپس، مائیکل بریسویل، میٹ ہنری، کائل جیمیسن، ول اورورک شامل ہیں ۔
یاد رہے کہ بھارت کی ٹیم پہلے سیمی فائنل میں آسٹریلیا کو شکست دے کر فائنل میں پہنچ چکی ہے۔ آج کا میچ جیتنے والی ٹیم کا فائنل میں مقابلہ اتوار کو بھارت سے ہوگا، جو دبئی انٹرنیشنل کرکٹ سٹیڈیم میں شیڈول ہے۔
