باغ:ن لیگ کی رہنما مریم نواز نے کہا کہ جس نے نواز شریف کی سیاست ختم کرنے کا منصوبہ بنایا وہ جماعت کرچی کرچی ہوگئی۔ مسلم لیگ کی سینئر نائب صدر مریم نواز نے آزاد کشمیر ضلع باغ میں جلسہ سے خطاب کرتے ہوئے کہاکہ شہدا کی یادگاروں کی بے حرمتی کرنے والا ہم میں سے نہیں ہو سکتا، وہ جس بنکر میں بھی چھپ کر بیٹھے قوم اسے کبھی معاف نہیں کرے گی۔
مریم نواز کا کہنا تھا 9 مئی کو جو ہوا اس سے شہدا کے وارثوں کی آنکھوں میں آنسو آئے، جس نے شہدا سے یہ سلوک کیا قوم اسے معاف نہیں کرے گی۔جو شہداکی یادگاروں کو آگ لگائے کیا وہ ہم میں سے ہو سکتا ہے؟ کوئی جتنا بھی مخالف ہو ملک کو آگ لگانے کی جرات نہیں کر سکتا، کشمیری بھائی اسے عبرت کا نشان بنا کر چھوڑیں گے۔
سینئر نائب صدر مسلم لیگ ن کا کہنا تھا وہ جماعت جسے کشمیر کے الیکشن میں دھاندلی کر کے جتوایا گیا تھا کہاں گئی؟ ۔ مسلم لیگ ن آج ڈٹ کر کھڑی ہے، نواز شریف کی ترقی کا دور نکال دو تو پاکستان میں کچھ نظر نہیں آتا۔ نواز شریف نےکشمیر کے لیے ایک کھرب روپے ڈویلپمنٹ فنڈ رکھا، ایک ایک پیسا آپ کی ترقی پر خرچ ہوا۔
وہ جماعت جہاں سے آئی تھی وہاں چلی گئی، آزاد کشمیر کا سابق وزیراعظم عمران خان کے خلاف گواہی دے رہا ہے۔ آزاد کشمیر کا سابق وزیراعظم کہتا ہے 9 مئی کا پلان اس نے بنایا تھا، جس نے نواز شریف کی سیاست ختم کرنےکا پلان بنایا وہ جماعت آج کرچی کرچی ہو گئی۔ جو کہتا تھا میں کلا ای کافی آں آج کلا ہی بیٹھا اے۔ مسلم لیگ ن کو ختم کرنے والے کئی آئے اور کئی چلے گئے، مسلم لیگ ن آج بھی ہے، اور ان شاء اللہ کل بھی رہے گی۔