اسلام آباد: وزیراعظم شہباز شریف نے کہا کہ وزیراعلیٰ پنجاب کا ماہانہ 100 یونٹس والے صارفین کو مفت بجلی فراہمی کا اعلان خوش آئند ہے ۔
اپنی ٹویٹ میں وزیر اعظم نے کہا کہ پہلے دن سے غریب ترین طبقے کو مشکل معاشی حالات کے اثر سے بچانا اولین ترجیح رہی ، معاشی حالات بہتر ہوتے ہی عوام کو مزید سہولتیں فراہم کریں گے ۔
پہلے دن سےغریب ترین طبقے کو مشکل معاشی حالات کے اثر سےبچانا ہماری اولین ترجیح رہی ہے۔وزیر اعلٰی پنجاب کا ماہانہ 100 یونٹس تک استعمال کرنے والےخاندانوں کے لیے بجلی کی مفت فراہمی کا اعلان نہایت خوش آئند ہے۔معاشی حالات بہتر ہوتے ساتھ ہی ہم آپ کو مزیدسہولیات فراہم کریں گے، انشاءاللّہ
— Shehbaz Sharif (@CMShehbaz) July 5, 2022
واضح رہے کہ گزشتہ روز حمزہ شہباز نے پنجاب میں 100 یونٹ تک بجلی مفت فراہم کرنے کا اعلان کیا تھا ۔ اپنی پریس کانفرنس میں انہوں نے کہا کہ آج عوام کیلئے ریلیف کا اعلان کرنے آیا ہوں ۔ پنجاب حکومت تقریباً 90 لاکھ ایسے خاندان جو 100 یونٹ تک بجلی استعمال کرتے ہیں ان کو مفت بجلی فراہم کرے گی ۔
انہوں نے کہا کہ عوام کو ریلیف فراہم کرنے کے سلسلے میں 200 ارب روپے آٹے پر سبسڈی دی ، ہسپتالوں میں کینسر سمیت دیگر ادویات مفت مل رہی ہیں ۔ آج قوم کو حقائق بتاؤں گا ثبوت بھی پیش کروں گا ۔
حمزہ شہباز نے کہا کہ عوام سازش کا سن سن کر تنگ آگئے ہیں ۔ ریاست مدینہ میں گھڑیوں کی لائن لگ گئی ۔ سیاست نہیں ریاست بچانے آئے ہیں ۔
