غزہ : اسرائیلی فورسز نے اپنے وحشیانہ پن کا مظاہرہ کرتے ہوئے غزہ پر دو روزہ بمباری کے دوران 130 فلسطینیوں کو شہید کر دیا۔ عرب میڈیا کے مطابق، تازہ ترین حملوں میں مزید 28 فلسطینیوں کی شہادت کی اطلاعات سامنے آئی ہیں، اور اسرائیلی فضائیہ نے صحت کے 227 مراکز پر 136 حملے کیے جس کے نتیجے میں اہم ہلاکتیں اور تباہی ہوئی۔
نصیرات پناہ گزین کیمپ پر ہونے والے حملے میں 4 بچوں سمیت 14 فلسطینی شہید ہوئے، جبکہ خان یونس میں ایک گاڑی پر اسرائیلی بمباری کے نتیجے میں 6 فلسطینی شہید ہو گئے۔ عرب میڈیا کے مطابق، غزہ میں شہداء کی مجموعی تعداد 45,658 ہو گئی ہے اور 1 لاکھ 8 ہزار 583 فلسطینی زخمی ہوئے ہیں۔
دوسری جانب حماس نے مصر میں ہونے والے مذاکرات میں جنگ بندی کی تجویز کا جائزہ لینا شروع کر دیا ہے۔ حماس کا کہنا ہے کہ وہ جنگ بندی معاہدے، اسرائیلی فوج کے انخلاء اور شہریوں کی واپسی کے لیے سنجیدہ ہیں۔
