لاہور : پنجاب کے مختلف شہروں میں آج بھی شدید دھند کا سامنا ہے، جس کے باعث حد نگاہ میں انتہائی کمی آئی ہے اور کئی مقامات پر موٹر ویز کو بند کر دیا گیا ہے۔ ترجمان موٹر وے پولیس کے مطابق، دھند کے سبب لاہور سے کوٹ مومن تک ایم 2، فیض پور سے سمندری تک ایم 3 اور لاہور سیالکوٹ موٹر وے ایم 11 پر ٹریفک کا داخلہ ممنوع قرار دیا گیا ہے۔
قومی شاہراہوں پر بھی دھند کے باعث حد نگاہ کم ہونے کے سبب ڈرائیورز کو مشکلات پیش آ رہی ہیں۔ موٹر وے پولیس کی جانب سے ڈرائیورز کو احتیاطی تدابیر اختیار کرنے کی ہدایت کی گئی ہے، جن میں فوگ لائٹس کا استعمال، اگلی گاڑی سے مناسب فاصلہ رکھنا اور تیز رفتار میں لین تبدیلی سے گریز شامل ہیں۔ عوام کو غیر ضروری سفر سے پرہیز کرنے کی بھی تاکید کی گئی ہے۔ اس کے علاوہ، دھند کے باعث فلائٹس آپریشن بھی متاثر ہو چکا ہے اور کئی پروازیں تاخیر کا شکار ہیں، جس سے مسافروں کو مشکلات پیش آ رہی ہیں۔
