لندن : برطانیہ میں شدید برف باری اور بارش کے باعث میٹ آفس نے بڑے پیمانے پر نقصان کا الرٹ جاری کر دیا ہے۔ میٹ آفس کے مطابق، لندن کی سڑکوں پر ٹریفک جام ہو گیا ہے، اور ریلوے و فضائی سفر میں تاخیر یا منسوخی کا خدشہ ہے۔ مزید 30 سینٹی میٹر تک برف باری کی توقع کی جا رہی ہے، اور دیہی علاقوں میں بجلی کی فراہمی منقطع ہونے کا امکان بھی ظاہر کیا گیا ہے۔
میٹ آفس نے یہ بھی بتایا کہ سکاٹ لینڈ کے دیہی علاقوں میں درجہ حرارت منفی 10 ڈگری تک جا سکتا ہے، جبکہ چیشائر اور سومر سیٹ میں درجہ حرارت منفی 5 ڈگری تک گر چکا ہے۔ برفانی صورتحال کے باعث لنکن شائر میں ایک حادثے میں 7 ماہ کے بچے کی ہلاکت کی رپورٹ بھی موصول ہوئی ہے۔ جنوبی انگلینڈ کی کونسلز نے موسمی صورتحال کو مدنظر رکھتے ہوئے ہنگامی اقدامات کیے ہیں تاکہ شہریوں کو کسی بھی نقصان سے بچایا جا سکے۔