تیرانا: مسلم اکثریتی یورپی ملک البانیا نے بے راہ روی اور تشدد کو فروغ دینے کے الزام میں فوری طور پر ٹک ٹاک پر ایک سال کے لیے پابندی عائد کر دی۔
خبر رساں ادارے 'رائٹرز' کے مطابق البانیا میں دسمبر 2024 میں ٹک ٹاک ویڈیو کی شوٹنگ کے دوران 14 سالہ لڑکے کے قتل کے بعد حکومت نے یکم جنوری 2025 کو اس ایپ پر پابندی لگانے کا فیصلہ کیا۔ البانیا کے وزیر اعظم نے اس اقدام کو نئی نسل کے لیے خطرہ قرار دیتے ہوئے فوری پابندی کا اعلان کیا۔ انہوں نے کہا کہ وہ ملک کی نئی نسل کو ٹک ٹاک کے اثرات سے بچانے کے لیے یہ قدم اٹھا رہے ہیں، کیونکہ اس ایپ کے استعمال سے تشدد کی حوصلہ افزائی ہو رہی ہے۔
وزیر اعظم اور دیگر حکومتی ارکان نے اس پابندی کی حمایت کی، تاہم عوام میں اس پر ملے جلے رد عمل سامنے آئے۔ بیشتر لوگوں نے اس پابندی کو سراہا، لیکن کچھ افراد کا کہنا تھا کہ ایپ پر پابندی اصل مسئلے کا حل نہیں۔ حزب اختلاف کی سیاسی جماعتوں نے اس پابندی کو حکومت کی جانب سے انتخابات میں دھاندلی کے طور پر بھی دیکھا۔
