اسلام آباد: پاکستان سمیت دنیا بھر میں یوم یکجہتی کشمیر آج بھرپور انداز میں منایا جا رہا ہے۔ اس دن کو منانے کے لیے ملک بھر میں ریلیاں، سیمینارز، اور خصوصی تقاریب کا انعقاد کیا جا رہا ہے۔ یوم یکجہتی کشمیر کے موقع پر پورے پاکستان اور آزاد کشمیر میں صبح 10 بجے ایک منٹ کی خاموشی اختیار کی جائے گی تاکہ مقبوضہ کشمیر کے مظلوم عوام کے ساتھ یکجہتی کا اظہار کیا جا سکے۔
آزاد جموں و کشمیر قانون ساز اسمبلی کے خصوصی اجلاس سے وزیر اعظم پاکستان شہباز شریف خطاب کریں گے اور کشمیر کے حق میں پاکستان کے مضبوط موقف کو اجاگر کریں گے۔
وزیراعظم نے گزشتہ 78 سالوں سے بھارت کے غیر قانونی اور غاصبانہ قبضے کے خلاف کشمیریوں کے حق خود ارادیت کے لیے پاکستانی قوم کی جانب سے مسلسل آواز بلند کرنے کی اہمیت پر زور دیا۔ یوم یکجہتی کشمیر کے دوران ہر گلی، شہر، اور کوچے سے آزادی کشمیر کا پیغام بلند ہو گا۔
اس موقع پر بھارت کے جبر کے خلاف ملک بھر میں جلسے، جلوسوں اور ریلیوں کا انعقاد کیا جائے گا، جس میں کشمیریوں کے حق آزادی کی حمایت کی جائے گی۔ حکومت پاکستان کے غیر متزلزل موقف کا اعادہ کرتے ہوئے اس دن کی اہمیت کو اجاگر کیا جائے گا۔
پاکستان کے علاوہ، دنیا کے مختلف ممالک جیسے امریکا، یورپ، مشرق وسطی اور آسٹریلیا میں بھی کشمیریوں کے حق میں مظاہرے اور احتجاج ہوں گے، جس میں بھارتی غاصبانہ قبضے اور سفاکانہ اقدامات کے خلاف آواز اٹھائی جائے گی۔
واضح رہے کہ یوم یکجہتی کشمیر پر حکومت پاکستان نے آج عام تعطیل کا اعلان کیا ہے تاکہ قوم اس دن کی اہمیت کو سمجھ سکے اور کشمیریوں کے ساتھ یکجہتی کا اظہار کر سکے۔ دوسری جانب مقبوضہ کشمیر میں بھی پاکستان سے اظہارِ تشکر کے پوسٹرز آویزاں کیے گئے ہیں، جن پر وزیراعظم شہباز شریف، آرمی چیف جنرل عاصم منیر، اور وزیراعظم آزاد کشمیر کی تصاویر نمایاں ہیں۔
