راولپنڈی : صدر ایکس سروس مین سوسائٹی جنرل ریٹائرڈ عبدالقیوم کا کہنا ہے کہ پاک فوج کو برا کہنے والے پاکستان کو کمزور کرنا چاہتے ہیں۔بھارت اور اسرائیل سے پیسے لے کر کچھ لوگ پاکستان اور باہر سے فوج کیخلاف زہریلا پروپیگنڈا کررہے ہیں، فوج کے خلاف سوشل میڈیا پر بات کرنے والوں کی ہوا 8 فروری کو نکل جائے گی۔
راولپنڈی پریس کلب میں ایڈمرل ر عبدالعلیم، ایئر کموڈور ر ارشد محمود خان، جنرل ر کمال اکبر و دیگر کے ہمراہ پریس کانفرنس سے خطاب کرتے ہوئے جنرل ریٹائرڈ عبدالقیوم کا مزید کہنا تھا کہ بھارت نے آج تک کشمیر سے متعلق اقوام متحدہ کی کسی قرارداد پر عمل نہیں کیا۔ بھارت اپنی فوج کے ذریعے آزادی کشمیر کی تحریک کو دبانے کی کوششیں کر رہا ہے، چند ممالک کو ویٹو کا حق دے کر اقوام متحدہ کے ہاتھ بھی باندھ دیئے گئے ہیں۔
انہوں نے کہا کہ اسرائیل اور امریکا اپنی رعونت کی وجہ سےفلسطین کی آزادی نہیں چاہتا، بھارت میں چھ سو سال پرانی مسجد گرا دی کسی نے آواز تک نہیں اٹھائی، بھارت نے نہایت بے شرمی کے ساتھ پاکستان کو ایف اے ٹی ایف میں رکھنے کی کوشش کی، بھارت کو کیسے یہ حق حاصل ہے کہ وہ بلوچستان کے لوگوں کو بھڑکائے، طاقتور ممالک جب چاہتے ہیں ڈرون سے کسی بھی ملک پر حملہ کر دیتے ہیں، جارحیت کرکے پھر اقوام متحدہ سے جا کر کلین چٹ بھی لے لیتے ہیں۔
انہوں نے مزید کہا کہ اقوام متحدہ جب تک بین الااقوامی سطح پر انصاف نہیں کرے گا، دنیا میں امن نہیں ہوسکتا،کشمیر سوئیٹزر لینڈ سے زیادہ اہمیت کا حامل خطہ ہے، افواج پاکستان کے پاس ہر قسم کی ٹیکنالوجی ہے مگر ہمارا جذبہ جہاد سب سے بڑا ہے، ایک سروے کے مطابق 74 فیصد عوام افواج پاکستان کے ساتھ ہے مگر میں کہتا ہوں کہ سو فیصد عوام افواج پاکستان کے ساتھ ہے، سوشل میڈیا پر چند لوگ الیکشن کے حوالے سے بھی فوج کے خلاف پروپیگنڈا کررہے ہیں، کسی میں ہمت نہیں کے فوج سے نبرد آزما ہو یہ پہلے بھی ناکام کوشش کرچکے ہیں۔
