لندن: وزیراعظم کے مشیر رانا ثناء اللہ کاکہنا ہے کہ حکومت جانے والی نہیں،وفاقی اور پنجاب کی حکومت کو نوازشریف کی رہنمائی حاصل ہے۔وزیراعظم کے مشیر رانا ثناء اللہ نے پاکستان ہائی کمیشن لندن آمد پر میڈیا سے گفتگو کرتے ہوئے کہا کہ حکومت جانے والی نہیں،وفاقی اور پنجاب کی حکومت کو نوازشریف کی رہنمائی حاصل ہے۔
رانا ثنا اللہ نے کہاکہ بانی پی ٹی آئی عمران خان کے ساتھ کوئی ڈیل کا معاملہ زیر غور نہیں۔رانا ثناء اللہ نے کہا کہ تمام سیاسی جماعتوں کو ملکر بیٹھنا ہوگا، پاکستان کی ترقی کے لئے سب جماعتیں آگے بڑھ کر مذاکرات کے عمل کو آگے بڑھائیں، بجلی کے مسئلے پر حکومت کوشش کر رہی ہے کہ بجلی کے بلوں پر کمی لائی جائے۔
ان کا مزید کہنا تھا کہ کوشش کر رہے ہیں کہ آئی پی پیز کو دینے والے پیسوں سے جان چھڑائیں، 2018ء میں ایک نیا پراجیکٹ لانچ کرکے ترقی کا پہیہ روکا گیا، بارہ بارہ سال سے فیڈریشن میں بیٹھے لوگوں کی کارکردگی صفر ہے۔
رانا ثنا اللہ نے کہاکہ وفاقی اور پنجاب کی حکومت کو نوازشریف کی رہنمائی حاصل ہے، وزیراعلیٰ خیبرپختونخوا تیس مار خان ہے، میٹنگ میں کچھ اور مؤقف رکھتا ہے اور پبلک میں کچھ اور، جن معاملات میں کے پی حکومت کو وفاق کے ساتھ تعاون کرنا چاہئے وہ ہو رہا ہے۔