کیلیفورنیا: ٹک ٹاک اور انسٹاگرام ریلز کی مقبولیت کے پیش نظر یوٹیوب نے اپنی شارٹس ویڈیوز کے لیے ویڈیو ایڈیٹر میں بڑی تبدیلیاں متعارف کرائی ہیں۔ ان نئی تبدیلیوں کا مقصد ان پلیٹ فارمز کے ساتھ مقابلہ کرنے کی صلاحیت کو مزید بہتر بنانا ہے۔
یوٹیوب کی جانب سے اپ ڈیٹ کیے گئے ویڈیو ایڈیٹر میں صارفین کو ویڈیوز میں زوم، اسنیپنگ اور باریک ایڈجسٹمنٹس کرنے کی سہولت ملے گی۔ اس کے ساتھ ہی ویڈیوز کو دوبارہ ترتیب دینے، فوٹیج حذف کرنے اور دیگر ایڈٹنگ آپشنز بھی مہیا کیے جائیں گے۔ اس کے علاوہ، نیا ویڈیو ایڈیٹر میوزک اور ٹیکسٹ کو شارٹس ویڈیوز میں شامل کرنے کی سہولت بھی فراہم کرے گا۔
یوٹیوب کی ٹیم نے بتایا کہ آئندہ چند ماہ میں آرٹیفیشل انٹیلی جنس (اے آئی) فیچرز بھی متعارف کرائے جائیں گے، جو ویڈیوز کو خودکار طور پر زیادہ انٹرایکٹو اور دلچسپ بنائیں گے۔ اس میں خاص طور پر کلپس کو گانے کے ساتھ خودکار طور پر سینک کرنے کا فیچر شامل ہے۔
