پشاور: خیبر پختونخوا میں دہشت گردوں کے خلاف گزشتہ ماہ میں ہونے والی کارروائیوں کے دوران 158 دہشت گرد ہلاک ہوگئے۔ صوبے کے 15 مختلف اضلاع میں مجموعی طور پر 73 آپریشنز کیے گئے جن کے نتیجے میں دہشت گردوں کو بھاری جانی نقصان اٹھانا پڑا۔
رپورٹ کے مطابق، مارچ کے مہینے میں سب سے زیادہ 40 دہشت گرد شمالی وزیرستان میں ہلاک ہوئے۔ دیگر اضلاع میں بھی دہشت گردوں کے خلاف سخت کارروائیاں کی گئیں۔ ڈی آئی خان میں 25، مہمند میں 20، بنوں اور مردان میں 18، 18 دہشت گرد ہلاک ہوئے۔ جنوبی وزیرستان میں 13، لکی مروت میں 7، باجوڑ میں 6، خیبر میں 4، کرک اور ٹانک میں 2، 2 دہشت گرد ہلاک ہوئے۔ اس کے علاوہ، چارسدہ، سوات، ہنگو اور پشاور میں ایک ایک دہشت گرد مارا گیا۔
رپورٹ میں مزید بتایا گیا کہ ان کارروائیوں کے دوران دہشت گردوں سے 123 ایس ایم جی، 29 راکٹ لانچر اور 9 مشین گن برآمد کی گئیں، جو ان کے قبضے سے بازیاب کی گئیں۔
