ٹوکیو: جاپان کے ایک ریسٹورنٹ نے کھانا کھانے کے دوران اسمارٹ فون استعمال کرنے پر پابندی عائد کر دی۔
غیر ملکی خبر رساں ایجنسی کے مطابق جاپان کے دارالحکومت ٹوکیو میں واقع دیبو چَن نامی رامین کے ریستوران نے گاہکوں پر مصروفیت کے وقت کھانا کھانے کے دوران موبائل کے استعمال پر پابندی لگا دی۔
ریسٹورنٹ کے مالک نے جگہ کی کمی کے باعث موبائل فون کے استعمال پر پابندی لگائی۔ ان کا کہنا تھا کہ رش کے دوران گاہک کھانا کھانے کے باوجود بیٹھے ہوتے ہیں اور موبائل فون کا استعمال کرتے تھے جس کی وجہ سے رش بنا رہتا۔
انہوں نے کہا کہ مشاہدے میں آیا کہ گاہک نے کھانا آرڈر کیا اور 4 منٹ تک کھانا شروع نہیں کیا وہ موبائل فون کی ویڈیوز دیکھنے میں مصروف رہا اور کھانا ٹھنڈا ہو گیا۔
دیبو چن نے کہا کہ ہم جو نوڈلز بناتے ہیں وہ ایک ملی میٹر چوڑے ہوتے ہیں جو جلدی خراب ہو جاتے ہیں۔ کھانا دیر سے شروع کرنے پر وہ خراب بھی ہو سکتا ہے۔