اسلام آباد : وزیراعظم شہباز شریف نے آذربائیجان کے ساتھ دستخط شدہ مفاہمتی یادداشتوں اور معاہدوں کو جلد عملی جامہ پہنانے کی ہدایت کی ہے۔ وزیر اعظم نے حالیہ دورہ آذربائیجان کے حوالے سے جائزہ اجلاس میں وزارت تجارت کو پاکستان اور آذربائیجان کے درمیان موجودہ تجارتی حجم کو 2 ارب ڈالر تک بڑھانے کے لیے جامع لائحہ عمل پیش کرنے کی ہدایت کی ہے۔
وزیراعظم نے آذربائیجان کے صدر کی جانب سے پاکستان میں 2 ارب ڈالر کی سرمایہ کاری کے اعلان پر بھی توجہ دلائی اور نائب وزیراعظم و وزیر خارجہ اسحاق ڈار کی زیر نگرانی ایک کمیٹی قائم کی، جو توانائی اور بنیادی ڈھانچے کے شعبوں میں معاہدوں کے لیے تیاری یقینی بنائے گی۔
وزیراعظم شہباز شریف نے آذربائیجان کے صدر کے آئندہ ماہ متوقع دورہ پاکستان سے قبل تمام ضروری تیاریاں مکمل کرنے کی ہدایت کی اور آذربائیجان سمیت دیگر ممالک میں ٹریڈ افسران کی تعیناتی کی سفارش بھی کی جہاں پاکستان کے ساتھ تجارت کی وسیع صلاحیت موجود ہے۔
اجلاس میں وزیراعظم نے کہا کہ پاکستان اور آذربائیجان کے درمیان دیرینہ برادرانہ تعلقات ہیں جو کئی دہائیوں پر محیط ہیں، اور پاکستان وسط ایشیائی ریاستوں کے ساتھ تجارت و سرمایہ کاری کے وسیع مواقع سے بھرپور فائدہ اٹھانے کے لیے اقدامات کر رہا ہے۔ اجلاس کو بتایا گیا کہ وزیراعظم کے دورے کے دوران پاکستان اور آذربائیجان کے درمیان دو طرفہ تعاون بڑھانے کے لیے 13 مفاہمتی یادداشتوں اور معاہدوں پر دستخط کیے گئے تھے۔
اجلاس میں نائب وزیراعظم اسحاق ڈار، وفاقی وزراء احد خان چیمہ، جام کمال خان، عبدالعلیم خان، ڈاکٹر مصدق ملک، معاون خصوصی طارق فاطمی اور دیگر اعلی حکام نے شرکت کی۔
