دبئی : آئی سی سی چیمپئنز ٹرافی 2025 کے پہلے سیمی فائنل میں آسٹریلیا نے بھارت کے خلاف ٹاس جیت کر پہلے بیٹنگ کرنے کا فیصلہ کیا ہے۔ یہ میچ دبئی انٹرنیشنل سٹیڈیم میں کھیلا جا رہا ہے، جہاں بھارتی ٹیم کی قیادت روہت شرما کر رہے ہیں جبکہ آسٹریلوی ٹیم کی قیادت سٹیو سمتھ کے ہاتھوں میں ہے۔
آسٹریلوی کپتان سٹیو سمتھ نے ٹاس کے بعد گفتگو کرتے ہوئے کہا کہ پاکستان کے مقابلے میں دبئی کی وکٹ کافی خشک ہے، جو کہ گیند کے ٹرن ہونے میں مدد دے گی۔ اس لیے ہم پہلے بیٹنگ کر کے ایک اچھا اسکور بنانا چاہتے ہیں تاکہ مخالف ٹیم پر دباؤ ڈال سکیں۔ انہوں نے یہ بھی بتایا کہ ٹیم میں دو تبدیلیاں کی گئی ہیں اور سپینسر جانسن کی جگہ سپر تنویر سنگھا کو شامل کیا گیا ہے۔
بھارتی کپتان روہت شرما نے کہا کہ ہمیں یہاں تین میچز کھیلنے کا تجربہ ہے اور ہمیں اپنی بہترین کرکٹ کھیلنی ہے چاہے ہم پہلے بیٹنگ کریں یا بولنگ۔
آسٹریلوی سکواڈ میں سٹیو سمتھ، کوپر کونولی، ٹریوس ہیڈ، مارنوس لبوشین، جوش انگلس، الیکس کیری، گلین میکسویل، بین دروشوئس، نیتھن ایلس، ایڈم زمپا اور تنویر سنگھا شامل ہیں۔ بھارتی ٹیم میں روہت شرما، شبمن گل، ویرات کوہلی، شریاس آئیر، اکشر پٹیل، کے ایل راہول، ہاردک پانڈیا، رویندرا جڈیجہ، محمد شامی، کلدیپ یادو اور ورون چکرورتی شامل ہیں۔
دونوں ٹیموں نے اب تک ٹورنامنٹ میں اپنے تمام میچز جیتے ہیں، بھارت نے اپنے تینوں میچ جیت کر سیمی فائنل میں جگہ بنائی ہے، جبکہ آسٹریلیا نے ایک میچ جیتا اور دو میچ بارش کی وجہ سے نہیں ہو سکے۔ ٹورنامنٹ کا دوسرا سیمی فائنل کل نیوزی لینڈ اور جنوبی افریقا کے درمیان لاہور کے قذافی سٹیڈیم میں کھیلا جائے گا، جبکہ فائنل 9 مارچ کو کھیلا جائے گا۔
