واشنگٹن: امریکا نے میکسیکو اور کینیڈا پر 25 فیصد ٹیرف کا نفاذ کر دیا ہے، جس کے ساتھ ساتھ چین سے اشیاء کی امریکا درآمد پر اضافی چارجز بھی آج سے نافذ العمل ہو گئے ہیں۔
امریکی صدر ڈونلڈ ٹرمپ نے کینیڈا اور میکسیکو کے ساتھ تجارتی معاہدے کے امکانات کو مسترد کرتے ہوئے کہا ہے کہ دونوں ممالک کے ساتھ کوئی تجارتی ڈیل ممکن نہیں ہے۔ صدر ٹرمپ کے اس اقدام کے باعث کینیڈا میں تیار ہونے والی اشیاء کی امریکا برآمد میں کمی کا خدشہ ہے، جس سے وہاں ملازمتوں کی کمی اور افراط زر میں اضافے کا امکان ہے۔
اس اقدام کا اثر امریکی سٹاک مارکیٹ پر بھی پڑا ہے، جہاں غیر معمولی گراوٹ دیکھی گئی۔ ایس اینڈ پی 500 میں ایک روز میں 1.8 فیصد کمی آئی، نیسڈیک کمپوزیٹ میں 2.6 فیصد اور ڈاؤ جونز انڈسٹریل میں 1.5 فیصد کمی ہوئی۔ یہ کمی 2025 میں پہلی بار دیکھی گئی ہے۔
