اسلام آباد: پاکستان نے اسرائیل سے مطالبہ کیا ہے کہ وہ لاکھوں مظلوم فلسطینیوں کو اجتماعی سزا دینے پر جوابدہ ہو اور فلسطینیوں کے حقوق کی پامالی کی ذمہ داری قبول کرے۔ پاکستان نے مستقل جنگ بندی اور تنازعے کے دو ریاستی حل پر مکمل عملدرآمد کا مطالبہ بھی کیا ہے۔
پاکستان نے رمضان المبارک میں اسرائیل کی جانب سے غزہ میں امدادی سامان کی ترسیل روکنے کی شدید مذمت کی ہے۔ دفتر خارجہ کے ترجمان کے مطابق، غزہ میں انسانی ہمدردی کی بنیاد پر امداد کی بندش اسرائیل کی منظم مہم کا حصہ ہے، جو بین الاقوامی قوانین کی صریح خلاف ورزی ہے۔ ترجمان کا کہنا تھا کہ فلسطینیوں کو امداد کی بندش جنگ بندی معاہدے کے لئے ایک سنگین خطرہ ہے۔
دفتر خارجہ کے ترجمان نے عالمی برادری سے بھی اپیل کی کہ وہ غزہ میں انسانی امداد کی فراہمی کو یقینی بنائے تاکہ فلسطینیوں کی زندگیوں کو بچایا جا سکے اور انہیں بنیادی ضروریات فراہم کی جا سکیں۔