جن کو آئی ایم ایف کا درد ہے وہ سوئس بینکوں میں پڑے پیسے واپس لائیں، فرخ حبیب

اسلام آباد: وزیر مملکت اطلاعات و نشریات فرخ حبیب نے کہا ہے کہ پرچی چیئرمین کی ملکی معیشت سے متعلق جھوٹی باتیں عوام کو گمراہ نہیں کر سکتیں، جن کو آئی ایم ایف کے قرضوں کا درد ہے وہ سوئس بینکوں میں پڑے پیسے واپس لے آئیں۔

فرخ حبیب نے کہا ہے کہ کل کے اتحادی آج کے دشمن بن چکے ہیں۔ ماضی میں این آر او لینے والے آج پھر این آر او کے متلاشی ہیں۔ کسی کو این آر او نہیں ملے گا۔ بلاول بتائیں کہ سندھ حکومت نے اب تک کتنی ویکسین کی خوراکیں خریدیں ہیں۔ پاکستان کی معیشت ترقی کر رہی ہے، تمام اشاریے مثبت آ رہے ہیں، تمام تر چینلجز کے باوجود ہماری معیشت ترقی کر رہی ہے۔

وزارت اطلاعات ونشریات میں ہنگامی پریس کانفرنس سے خطاب کرتے ہوئے ان کا کہنا تھا کہ ہمیں کوویڈ، ٹڈی دل حملے اور پی ڈی ایم کی بلیک میلنگ کا سامنا رہا۔ اس کے باوجود معاشی ترقی ریکارڈ ہے۔ ایکسپورٹ میں 13 فیصد اضافہ، تاریخ میں پہلی مرتبہ ایکسپورٹس اور ترسیلات زر سمیت 55 بلین ڈالر کا انفلو پاکستان میں آئے گا۔

انہوں نے کہا کہ لارج سکیل منیو فیکچرنگ میں 9 فیصد، گاڑیوں کی فروخت میں 54 فیصد، ٹیکس کی وصولی 4170 ارب روپے، ساڑھے 11 فیصد فیڈرل ایکسائز میں اضافہ ہوا ہے۔ پاکستان نے تاریخ میں ریکارڈ ریفنڈ 216 ارب روپے واپس کیا گیا ہے۔ کرنٹ اکاؤنٹ خسارہ 19.2 ملا تھا، 800 ارب ڈالر سرپلس ہے۔

وزیر مملکت نے کہا کہ اگر قرض کی قسطیں واپس نہ کرنا پڑی تو حکومت کی آمدن اخراجات سے زیادہ ہیں۔ زرعی ترقی، کسان خوشحال، کسان کو 1100ارب روپے اضا فی گیا ہے جس میں گندم کے کسان کو 500ارب روپے ملے ہیں جس کی وجہ سے گندم کی مجموعی پیداوار 27.3ملین ٹن ہوئی ہے۔

ان کا کہنا تھا کہ آئی ایم ایف کی بات کرنے والے بتائیں ان کے والد آئی ایم ایف کے پاس نہیں گئے تھے؟ انھیں اتنی فکر کرنے کی ضرورت نہیں ہے۔ پیپلز پارٹی دور میں بیرونی قرضوں میں 32 فیصد اضافہ ہوا، ڈالر 62 روپے سے 95 روپے پر لے گئے تھے۔ بجلی کی لوڈشیڈنگ اور ہر جانب کرپشن کی بہاریں تھیں۔

انہوں نے کہا کہ سندھ کے غریب کی بات کرنے والے 13 سالوں سے سندھ میں حکومت کر رہے ہیں۔ غربت کے خاتمے کے لئے کیا اقدامات کیے ہیں۔ 14 ارب روپے کی گندم چوری ہوتی ہے تو وہ چوہوں کا نام لگاتے ہیں۔