لاہور: لاہور میں فری وائی فائی کی مدد سے مفت انٹرنیٹ سروس استعمال کرنے والوں کی تعداد 40 لاکھ ہوگئی ہے۔ اعداد وشمارکے مطابق لاہور میں سیف سٹی نیٹ ورک کے ذریعے مفت وائی فائی سروس کی فراہمی جاری ہے۔ترجمان سیف سٹی سینٹر کے مطابق لاہور میں اب تک 40 لاکھ سے زائد شہری مفت انٹرنیٹ سروس سے فائدہ اٹھا رہے ہیں۔ یومیہ 65 ہزار افراد مفت وائی فائی سروس استعمال کررہے ہیں۔
سیف سٹی نیٹ ورک سائبرسیکیورٹی ،فائر والز اور دیگر سسٹم سکیورٹی پروٹوکولز کی بدولت محفوظ ہے۔لاہور میں فری وائی فائی پوائنٹس کی تعداد 200 سے بڑھا کر 450 تک کی جائے گی۔ اگلے مرحلے میں فری وائی فائی پروجیکٹ قصوراور ننکانہ صاحب سمیت پنجاب کے دیگراضلاع تک لے جایا جائے گا۔
فری وائی فائی پوائنٹس کی تنصیب عوامی مقامات، سکولوں ، اسپتالوں اور پارکوں کے قریب کی گئی ہے۔ شہری فری وائی فائی سروس سے ویمن سیفٹی ایپ ، پنجاب پولیس ایپ اور واٹس ایپ استعمال کرسکتے ہیں۔مفت انٹرنیٹ سروس کے ذریعے ٹیکسی رائیڈ بھی بک کروائی جا سکتی ہے۔