پشاور: جائیداد سے حصہ مانگنے پر بھائی بہن کے دشمن بن گئے ، تشدد کی ویڈیو وائرل ہوگئی ۔ خیبرپختون خوا پولیس نے خاتون پر تشدد کرنے کی ویڈیو وائرل ہونے کے بعد ایکشن لیتے ہوئے دونوں ملزمان کو گرفتار کرلیا۔
کے پی پولیس ترجمان کے مطابق فیس بک پر ایک ویڈیو اپلوڈ ہوئی، جس میں ملزمان کو ایک خاتون پر تشدد کرتے دکھایا گیا ہے۔ ویڈیو منظر عام پر آنے کے بعد کپیٹل سٹی پولیس نے فوری کارروائی کرتے ہوئے دو ملزمان آفتاب اور ارشد پسران عبدالحنان ساکنان امین کالونی کو حراست میں لے کر حوالات منتقل کر دیا ہے۔
پولیس حکام کے مطابق ملزمان نے تفتیش کے دوران اعتراف کیا کہ انہوں نے جائیداد میں حصہ مانگنے پر بہن کو تشدد کا نشانہ بنایا۔
پولیس حکام کے مطابق متاثرہ خاتون کو میڈیکل کے لیے اسپتال منتقل کردیا گیا ہے، جس کی رپورٹ آنے کے بعد ملزمان کے خلاف تھانہ بھانہ ماڑی میں مقدمہ درج کیا جائے گا۔
