کراچی: ایئر چیف مارشل ظہیر احمد بابر سدھو نے کہا ہے کہ عالمی سطح پر درپیش چیلنجز کا مقابلہ کرنے کے لیے ہمیں ہمہ وقت مکمل تیاری کی حالت میں رہنا ہوگا۔
کراچی میں پاکستان نیوی کیڈٹس کی پاسنگ آؤٹ پریڈ کی تقریب سے خطاب کرتے ہوئے ایئر چیف مارشل نے کہا کہ پاکستان فضائیہ خطے میں طاقت کے توازن کو مستحکم کرنے میں اہم کردار ادا کر رہی ہے، اور پاکستان نیول اکیڈمی دنیا کے بہترین تعلیمی اداروں میں شامل ہے۔ انہوں نے پاس آؤٹ ہونے والے کیڈٹس کی تربیت اور ڈسپلن کی ستائش کرتے ہوئے ان کی محنت اور عزم کو سراہا۔
ایئر چیف مارشل نے مزید کہا کہ پاکستان نیوی سمندری حدود کی حفاظت میں کلیدی کردار ادا کر رہی ہے اور خطے میں توازن برقرار رکھنے کے لیے یہ ہماری مشترکہ ذمہ داری ہے۔ انہوں نے اس بات پر زور دیا کہ عالمی چیلنجز سے نمٹنے کے لیے جدید ٹیکنالوجی کا استعمال تربیتی کورسز کا حصہ بنانا ضروری ہے۔
انہوں نے کہا کہ پاکستان کی معیشت اللہ کے فضل سے مستحکم ہو رہی ہے، اور مضبوط معیشت ہی دفاعی صلاحیتوں کو مزید تقویت دیتی ہے۔ ایئر چیف مارشل نے عالمی برادری سے اپیل کی کہ مسئلہ کشمیر کے حل کے لیے اپنا کردار ادا کرے اور بھارت پر دباؤ ڈالے کہ وہ کشمیر میں مظالم کا خاتمہ کرے۔ اس کے علاوہ، انہوں نے غزہ میں انسانی حقوق کی پامالیوں پر بھی گہری تشویش کا اظہار کیا۔
اس موقع پر ایئر چیف مارشل ظہیر احمد بابر سدھو نے 122ویں مڈشپ مین اور 30ویں شارٹ سروس کمیشن کورس کی پاسنگ آؤٹ پریڈ کا معائنہ کیا۔ پاس آؤٹ ہونے والے کیڈٹس نے شاندار مارچ پاسٹ کیا اور سلامی دی، جبکہ قومی ترانہ بھی پڑھا گیا۔
پاکستان نیوی میں 79 افسران نے کمیشن حاصل کیا ہے۔ کمانڈنٹ وجاہت جاوید نے پاس آؤٹ ہونے والے کیڈٹس سے حلف لیا، جنہوں نے پاکستان کی خدمت اور اپنے فرائض کی ذمہ داری کا عہد کیا۔
