لاہور: متحدہ عرب امارات کی مسلح افواج کے ڈپٹی سپریم کمانڈر اور ابو ظبی کے ولی عہد شیخ محمد بن زاید آل نہیان 6 جنوری اتوار کو پاکستان کے ایک روزہ دورے پر اسلام آباد آئیں گے۔
ولی عہد وزیراعظم عمران خان ، آرمی چیف جنرل قمر جاوید باجوہ اور سیاسی قائدین سے ملاقات کریں گے اور ان سے پاکستان اور یو اے ای کے درمیان دو طرفہ تعلقات، خطے کی صورت حال اور باہمی دلچسپی کے امور پر تبادلہ خیال کریں گے۔ میڈیا رپورٹ کے مطابق ان کے دورے کے موقع پر یو اے ای کی جانب سے پاکستان کے لیے دو ارب ڈالرز کی امداد اور سرمایہ کاری سے متعلق امور پر بھی غور کیا جائے گا۔
خیال رہے کہ نومبر 2018 میں وزیراعظم عمران خان نے متحدہ عرب امارات کا دورہ کیا تھا۔ انھوں نے امارات کی قیادت سے بات چیت میں دونوں ملکوں کے درمیان دوطرفہ تعلقات کو طویل المدت تزویراتی اور اقتصادی شراکت داری میں تبدیل کرنے پر اتفاق کیا تھا۔ اس کے علاوہ دو طرفہ سیاسی ، تجارتی اور اقتصادی تعلقات کو مزید مضبوط بنانے سے اتفاق کیا تھا۔
