راولپنڈی: راولپنڈی کی انسداد دہشت گردی عدالت نے بشریٰ بی بی کو عدالت میں پیش نہ کرنے پر سپرنٹنڈنٹ اڈیالہ جیل کو نوٹس جاری کر دیا۔
سماعت جج امجد علی شاہ کی زیر قیادت ہوئی، جس میں بشریٰ بی بی کے وکیل محمد فیصل ملک کی جانب سے دائر درخواست پر کارروائی کی گئی۔ درخواست میں یہ مؤقف اختیار کیا گیا کہ 26 نومبر کے 31 مقدمات میں عبوری ضمانت پر سماعت کے لیے بشریٰ بی بی کو عدالت میں پیش ہونا تھا، لیکن عدالتی احکامات کے باوجود جیل انتظامیہ نے انہیں پیش نہیں کیا۔
درخواست میں کہا گیا کہ جیل انتظامیہ کی جانب سے بشریٰ بی بی کو پیش نہ کر کے عدالت کی توہین کی گئی ہے۔ درخواست گزار نے عدالت سے استدعا کی کہ جیل انتظامیہ سے پوچھا جائے کہ بشریٰ بی بی کو کیوں پیش نہیں کیا گیا۔
عدالت نے سپرنٹنڈنٹ اڈیالہ جیل کو نوٹس جاری کرتے ہوئے 6 فروری کو ذاتی حیثیت میں پیش ہونے کا حکم دے دیا۔
