اسلام آباد:سینیٹ کی قائمہ کمیٹی برائے داخلہ نے بھکاریوں کے حوالے سے سزاؤں میں اضافے اور پریونشن آف سمگلنگ آف مائیگرنٹس سے متعلق بل متفقہ طور پر منظور کر لیا۔
کمیٹی کا اجلاس سینیٹر فیصل سلیم کی صدارت میں ہوا، جس میں حکومت کی جانب سے "پریونشن آف سمگلنگ آف مائیگرنٹس" بل پیش کیا گیا۔
سیکرٹری داخلہ خرم آغا نے اجلاس میں بتایا کہ انسانی سمگلنگ کے واقعات میں اضافہ ہو رہا ہے اور اس بل کے ذریعے ملزمان کی سزا کو بڑھایا جائے گا تاکہ ضمانتیں جلد منظور نہ ہو سکیں۔ انہوں نے کہا کہ اس بل میں سزا کی مدت 7 سال سے بڑھا کر 10 سال کر دی جائے گی۔کمیٹی نے اس بل کو متفقہ طور پر منظور کیا۔
اس کے بعد، بھکاریوں کے حوالے سے سزاؤں میں اضافے کا بل بھی پیش کیا گیا۔ وزارت قانون نے بتایا کہ اس بل میں بھکاریوں کی معاونت کرنے والوں اور سہولت کاروں کے لیے بھی سزاؤں میں اضافہ کیا گیا ہے، اور اب انہیں 10 سال تک سزا دی جا سکے گی۔کمیٹی نے بھکاریوں سے متعلق بل بھی متفقہ طور پر منظور کر لیا