پشاور: پشاور کے ارباب نیاز کرکٹ سٹیڈیم میں 20 سال بعد کرکٹ میچ کروانے پر غور شروع کر دیا گیا ہے۔ پولیس حکام کے مطابق، پی ایس ایل کے میچز کی ممکنہ میزبانی کے لیے آئی سی سی کی ٹیم نے ارباب نیاز سٹیڈیم کا دورہ کیا۔
آئی سی سی کی ٹیم نے غیرملکی کھلاڑیوں کے لیے گراؤنڈ، پویلین، ایریا روٹ اور ہوٹل روٹ کا سروے کیا اور سکیورٹی انتظامات پر بھی بات چیت کی۔ پشاور پولیس چیف نے آئی سی سی کی ٹیم کو سکیورٹی صورت حال پر بریفنگ دی۔
پولیس حکام کا کہنا ہے کہ شائقین کے لیے شٹل سروس، ڈرون کیمرا مانیٹرنگ اور سٹیڈیم کے قریب ہیلی پیڈ بنانے کا منصوبہ بنایا جا رہا ہے۔ پی سی بی نے اپریل میں پی ایس ایل کے دو میچز پشاور میں کرانے کی تجویز پر غور کیا ہے، اور غیر ملکی کھلاڑیوں کی سکیورٹی کے لیے تسلی بخش انتظامات کرنے کی یقین دہانی کرائی گئی ہے۔
واضح رہے کہ ارباب نیاز سٹیڈیم میں آخری میچ 2006 میں پاکستان اور بھارت کے درمیان کھیلا گیا تھا۔ اگر یہ منصوبہ کامیاب ہوتا ہے تو پشاور کے کرکٹ شائقین کے لیے ایک بڑی خوشخبری ہو گی۔
