اسلام آباد : پاکستان کے صدر آصف علی زرداری چینی ہم منصب شی جن پنگ کی دعوت پر آج چین کے 4 روزہ سرکاری دورے پر روانہ ہو رہے ہیں۔ دفتر خارجہ کی جانب سے جاری کیے گئے اعلامیے کے مطابق، یہ دورہ 4 سے 8 فروری تک جاری رہے گا، جس دوران صدر زرداری بیجنگ میں چینی حکام، بشمول چینی وزیر اعظم لی چیانگ، اور دیگر اعلیٰ حکام سے ملاقاتیں کریں گے۔
دورے کے دوران ہونے والی ملاقاتوں میں پاک چین اقتصادی راہداری (سی پیک)، انسداد دہشت گردی، سیکیورٹی تعاون، اور پاک چین تعلقات کے مختلف پہلوؤں پر تبادلہ خیال کیا جائے گا۔ اقتصادی اور تجارتی تعاون پر خصوصی توجہ دی جائے گی، اور دونوں ممالک عالمی و علاقائی جغرافیائی سیاسی منظرنامے پر بھی بات کریں گے۔
اس دورے میں صدر زرداری چین کے صوبے ہیلونگجیانگ میں ہونے والی 9ویں ایشین ونٹر گیمز کی افتتاحی تقریب میں بھی شرکت کریں گے۔ دفتر خارجہ کے مطابق، یہ دورہ پاکستان اور چین کے درمیان اعلیٰ سطح کے تبادلوں کی روایت کو اجاگر کرتا ہے اور دونوں ممالک کی اسٹریٹجک تعاون پر مبنی شراکت داری کو مزید مضبوط بنانے کے عزم کا اظہار کرتا ہے۔
