ٖغزہ : اسرائیلی فوج نے مقبوضہ مغربی کنارے کے شہر جنین میں اتوار کو آپریشن کے دوران مہاجر کیمپ میں دھماکوں کے ذریعے متعدد عمارتوں کو تباہ کر دیا۔ غیر ملکی میڈیا کے مطابق، قابض فورسز کے حملے میں 23 عمارتیں مکمل طور پر تباہ ہو گئیں۔
اسرائیلی فوج کے ترجمان نے کہا کہ جنین میں دہشت گردی کے خطرات کے پیشِ نظر یہ کارروائی کی گئی اور 23 عمارتیں تباہ کی گئیں۔ فوج نے یہ دعویٰ بھی کیا کہ جنوری کے وسط سے اب تک مغربی کنارے میں 50 فلسطینی جنگجوؤں کو شہید کیا گیا ہے۔
فلسطینی وزارت خارجہ نے اس کارروائی کی مذمت کرتے ہوئے اسے وحشیانہ قرار دیا، اور فلسطینی صدر محمود عباس نے اقوام متحدہ کی سلامتی کونسل سے مطالبہ کیا کہ جنین اور طولکرم کیمپوں میں رہائشی عمارتوں کی تباہی کو روکا جائے۔
دوسری جانب مغربی کنارے کے جنوبی علاقے اروب میں اسرائیلی فوج نے ایک اور حملے میں 27 سالہ محمد امجد حدوش کو شہید کر دیا۔
