لاہور: پاکستان تحریک انصاف (پی ٹی آئی) کے رہنماءاور سابق وزیر خارجہ شاہ محمود قریشی نے کہا ہے کہ چیئرمین عمران خان کی کال پر پورے پاکستان کی جیلیں بھر دیں گے۔
تفصیلات کے مطابق شاہ محمود قریشی نے سماجی رابطوں کی ویب سائٹ ٹوئٹر پر جاری پیغام میں لکھا ’چیئرمین عمران خان کی کال پر ہم پورے پاکستان کی جیلیں بھر دیں گے۔ فاشسٹ امپورٹڈ حکومت کا یہ شوق بھی پورا ہو جائے گا۔ ہتھکڑیاں اور تشدد کچھ بھی نہیں، وطن کیلئے جان بھی حاضر ہے۔‘
چئیرمین عمران خان کی کال پر ہم پورے پاکستان کی جیلیں بھر دینگے۔ فاشسٹ امپورٹڈ حکومت کا یہ شوق بھی پورا ہو جائے گا۔ ہتھکڑیاں اور تشدد کچھ بھی نہیں وطن کے لئے جان بھی حاضر ھے۔#جیل_بھرو_تحریک
— Shah Mahmood Qureshi (@SMQureshiPTI) February 4, 2023
واضح رہے کہ پاکستان تحریک انصاف (پی ٹی آئی) کے چیئرمین عمران خان کے ہفتے کے روز اپنے خطاب میں جیل بھرو تحریک شروع کرنے کا اعلان کرتے ہوئے کہا کہ کارکن تیاریاں شروع کر دیں۔
ان کا کہنا تھا کہ ہمارے پاس دو راستے ہیں یا تو پہیہ جام ہڑتال کی کال دیں یا پھر جیل بھرو تحریک شروع کریں اور ہم جیل بھرو تحریک شروع کرنے لگے ہیں، حکومت کا شوق ہے ہمیں جیل میں ڈالے تو ہم خود جیل میں چلے جائیں گے۔
