اسلام آباد: مسلم لیگ (ن) کی ترجمان مریم اورنگزیب نے کہا ہے کہ قرضہ لینے پہ خودکشی کرنے والے نے ہر پاکستانی پر واجب الادا قرض میں 50 فیصد اضافہ کر دیا ہے ۔ پاکستان کی تاریخ میں لیے گئے کل قرض کا 70 فیصد عمران صاحب نے اپنے ساڑھے تین سال کی مدت میں ملک پر مسلط کر دیا ہے۔
انہوں نے اپنے بیان میں کہا کہ عمران صاحب نے ہر پاکستانی بچے، بوڑھے، نوجوان، خواتین کو مقروض بنا دیا ہے ۔ عمران صاحب کی وجہ سے 58 ہزار سے بڑھ کر آج ہر پاکستانی ایک لاکھ 79 ہزار روپے سے زیادہ کا مقروض ہو چکا ہے ۔ عمران صاحب کے مسلط ہونے کے تین سال کے عرصے میں ہر پاکستانی پر واجب الادا قرض میں 50 فیصد اضافہ ہوگیا ۔
انہوں نے کہا کہ دو کروڑ بیس لاکھ لوگ غربت کی لکیر سے نیچے دھکیل دیے گئے ہیں جس میں سے ایک کروڑ چالیس لاکھ بچے ہیں ۔ ساڑھے تین سال میں عوام کو غریب اور مقروض کر دیا ہے ۔ وزیر خزانہ نے بڑی خوشی سے پاکستان کے مزید ایک ارب ڈالر مقروض ہونے کا اعلان کیا ۔
مریم اورنگزیب کا کہنا تھا کہ عمران صاحب پر نظر رکھی جائے، آئی ایم ایف سے قرض لینے پر خودکشی ہی نہ کرلیں؟ دنیا بھر میں پاکستان کو مقروض بنایا جا رہا ہے۔ سوال یہ ہے کہ عمران صاحب نے قوم پر جو قرض لادا ہے، یہ کون ادا کرے گا؟ عمران صاحب کے اس قومی جرم کی ادائیگی پاکستان کے نوجوان اور آنے والی نسلوں کو کرنی پڑے گی۔
انہوں نے کہا کہ اپوزیشن میں قرض کے خلاف بولنے والے عمران صاحب نے حکومت میں آنے کے بعد پاکستان کی تاریخ میں سب سے زیادہ ملک کو مقروض کر دیا۔ ساڑھے تین سال میں صاحب نے ملک اور عوام کو صرف مقروض کیا ہے ۔ قرض لینے کا عمران صاحب کا تاریخی ریکارڈ پاکستان کے لئے خطرناک ہے۔
مریم اورنگزیب کا کہنا تھا کہ ساڑھے تین چار سال میں پاکستان سب سے زیادہ مقروض ہوگیا لیکن عمران خان کا بنی گالہ کا محل ریگولرائز ہوگیا ۔ پاکستان کی فی کس آمدن کم ہوگئی لیکن تین سال میں عمران صاحب کی آمدن 90 فیصد بڑھ گئی۔ تین سال میں عمران صاحب کو تو سب کچھ نیا مل گیا لیکن عوام کو قرض، بھوک، بے روزگاری اور مہنگائی کے سوا کیا ملا ؟۔
