ایران کا دورہ کرنے پر سابق نارویجن وزیراعظم کوامریکی ائیرپور ٹ پر روک لیاگیا

واشنگٹن :ناروے کے سابق وزیراعظم جیل مونوبونووک کو 3 سال پہلے کیے گئے ایرانی دورے کی وجہ سے امریکا کے ایئرپورٹ پر روک لیا گیا، سابق وزیراعظم امریکی حکام کے رویے پر حیران پریشان رہ گئے۔غیرملکی خبررساں ادارے کے مطابق سابق نارویجن وزیراعظم امریکا کے سالانہ پریئر بریک فاسٹ میں شرکت کرنے واشنگٹن کے ایئرپورٹ پر پہنچے تو ان کا پاسپورٹ دیکھ کر کسٹم حکام نے انہیں روک لیا۔دوران تفتیش پتا چلا کہ سابق نارویجن وزیراعظم کو 2014 ءمیں کیے گئے ان کے ایرانی دورے کی وجہ سے روکا گیا۔امریکی حکام نے ان کے سابقہ عہدے کا بھی لحاظ نہیں کیا اور ایک گھنٹے تک تفتیش کے بعد انہیں جانے دیا۔جیل مونوبونووک دو بار ناروے کے وزیراعظم رہے ہیں۔