لاہور: پاکستان سپر لیگ (پی ایس ایل) کے 10ویں ایڈیشن کے دوران لاہور کے مختلف سکولوں کے اوقات کار میں تبدیلی کر دی گئی ہے، جس کا نوٹیفکیشن محکمہ تعلیم پنجاب نے جاری کر دیا۔
نوٹیفکیشن کے مطابق، قذافی سٹیڈیم اور ملحقہ علاقوں میں قائم 56 سکولوں کے نئے اوقات صبح 7 بجے سے 12 بجے تک ہوں گے۔ ان سکولوں کا تعلق لاہور کے مختلف علاقوں سے ہے جن میں گلبرگ، ماڈل ٹاؤن، اچھرہ، جیل روڈ، فیروز پور روڈ، شادمان، کینال روڈ، اپرمال اور ظہور الٰہی روڈ شامل ہیں۔
اس نوٹیفکیشن میں پی ایس ایل میچز کے شیڈول کی بھی تفصیلات فراہم کی گئی ہیں، جن کا آغاز 28 مارچ سے 21 اپریل تک ہو گا۔ لاہور میں پی ایس ایل میچز 24 اپریل سے 18 مئی تک شیڈول کیے گئے ہیں اور ان کا آغاز شام 7 بجے ہوگا۔
مزید برآں، لاہور میں آئی سی سی ویمنز کرکٹ ورلڈ کپ کوالیفائیر کے پریکٹس میچز بھی آج سے شروع ہو رہے ہیں، اور ان کا آخری میچ 19 اپریل کو ہوگا۔
