کراچی : پاکستان پیپلز پارٹی کے بانی چیئرمین اور سابق وزیراعظم ذوالفقار علی بھٹو کی 46 ویں برسی آج بڑے عقیدت و احترام کے ساتھ منائی جا رہی ہے۔ سابق وزیراعظم کو 1979 میں آج کے دن راولپنڈی میں پھانسی دی گئی تھی۔ ان کی خدمات اور قربانیوں کو یاد کرتے ہوئے پیپلز پارٹی نے اس دن کو یادگار بنانے کے لیے مختلف تقریبات کا انعقاد کیاگیا ہے۔
سپریم کورٹ نے پچھلے سال مارچ میں یہ فیصلہ دیا تھا کہ ذوالفقار علی بھٹو کا ٹرائل منصفانہ نہیں تھا، جو ان کی پھانسی کے مقدمے پر سوالات اٹھاتا ہے۔ دوسری جانب پیپلز پارٹی کی جانب سے ذوالفقار علی بھٹو کی برسی پر آج سندھ بھر میں عام تعطیل کا اعلان کیا گیا ہے، جہاں مختلف تقریبات اور جلسے منعقد کیے جا رہے ہیں۔
آصف علی زرداری کا پیغام
صدر مملکت آصف علی زرداری نے اپنے بیان میں کہا کہ شہید بھٹو ایک عظیم مدبر، جرات مند رہنما اور عوام کے حقیقی نمائندہ تھے۔ ان کی جدوجہد، قربانیاں اور پاکستان کے لیے دی جانے والی خدمات کو خراجِ عقیدت پیش کیا۔
شہید ذوالفقار علی بھٹو کی زندگی پر ایک نظر
ذوالفقار علی بھٹو 5 جنوری 1928 کو لاڑکانہ میں پیدا ہوئے اور آکسفورڈ یونیورسٹی سے قانون کی تعلیم حاصل کی۔ انہوں نے 1963 میں جنرل ایوب خان کی کابینہ میں وزیر خارجہ کی حیثیت سے اپنے سیاسی سفر کا آغاز کیا، اور 1967 میں پاکستان پیپلز پارٹی کی بنیاد رکھی۔ ان کا نعرہ "روٹی، کپڑا اور مکان" عوام میں بہت مقبول ہوا۔
1970 کے انتخابات میں پیپلز پارٹی کی کامیابی کے بعد وہ اقتدار میں آئے اور ملک کو متفقہ آئین دیا، بھارت سے شملہ معاہدہ کر کے امن کی بنیاد رکھی اور ایٹمی پروگرام کی بنیاد رکھی۔ ذوالفقار علی بھٹو کی شہادت کے بعد ان کی سیاسی فکر اور نظریات کو ان کی بیٹی بینظیر بھٹو نے آگے بڑھایا اور اب بلاول بھٹو زرداری اپنے نانا کے سیاسی مشن کو جاری رکھنے کی کوشش کر رہے ہیں۔