ہانگ کانگ:سری لنکا نے ہانگ کانگ سپر سکسز کے فائنل میں پاکستان کو 3 وکٹوں سے ہرا کر دوسری بار ایونٹ کا ٹائٹل اپنے نام کر لیا۔ یہ میچ ہانگ کانگ میں کھیلا گیا، جہاں سری لنکا کے کپتان لاہیورو مدوشنکا نے ٹاس جیت کر پہلے فیلڈنگ کا فیصلہ کیا۔
پاکستان کی بیٹنگ ابتدائی طور پر ہی مشکلات کا شکار رہی، پہلے اوور میں آصف علی بغیر کوئی رن بنائے آؤٹ ہوئے، جب کہ حسین طلعت صرف 1 رن کے ساتھ پویلین لوٹ گئے۔ دونوں کھلاڑی دھننجیا لکشن کی گیندوں پر آؤٹ ہوئے۔
اس صورتحال کے بعد، آل راؤنڈر فہیم اشرف اور اوپننگ بیٹر محمد اخلاق نے اننگز کو سنبھالا، اور اسکور 34 رنز تک پہنچانے میں مدد کی۔ محمد اخلاق نے 20 گیندوں پر 48 رنز بنائے، جس میں 5 چوکے اور 3 چھکے شامل تھے۔ فہیم اشرف نے 13 رنز بنائے، مگر دیگر بیٹرز خاطر خواہ کارکردگی نہ دکھا سکے۔
پاکستان کی پوری ٹیم 5.2 اوورز میں 72 رنز پر آؤٹ ہو گئی، جبکہ سری لنکن باؤلرز نے شاندار کھیل کا مظاہرہ کیا۔ دھننجیا لکشن اور تھرینڈو رتنائیکے نے 2،2 وکٹیں حاصل کیں۔
سری لنکا نے 73 رنز کا ہدف 5 اوورز میں 3 وکٹوں کے نقصان پر حاصل کر لیا۔ سندون ویراکوڈی نے 13 گیندوں پر 34 رنز بنا کر اپنی ٹیم کی فتح میں اہم کردار ادا کیا۔ کپتان لاہیورو مدوشنکا نے 5 گیندوں پر 19 رنز بنائے، جس سے ان کی ٹیم نے 2007 کے بعد پہلی بار یہ ایونٹ جیتا۔
میچ کا بہترین کھلاڑی دھننجیا لکشن قرار دیا گیا، جبکہ ایونٹ میں بہترین کارکردگی دکھانے پر تھرینڈو رتنائیکے کو پلیئر آف دی سیریز کا ایوارڈ ملا۔