لاہور : پنجاب حکومت نے لاہور میں سموگ کی سنگین صورتحال کے باعث سرکاری اور نجی پرائمری سکولوں کو ایک ہفتے کے لیے بند کرنے کا فیصلہ کیا ہے۔
سینئر صوبائی وزیر مریم اورنگزیب نے اس حوالے سے پریس کانفرنس میں بتایا کہ ہوا کی آلودگی کا انڈیکس صبح کے وقت ایک ہزار سے تجاوز کر گیا، جبکہ بارڈر کے قریب یہ 1900 تک پہنچ گیا تھا۔
انہوں نے مزید کہا کہ بھارت سے آنے والی تیز ہواؤں نے لاہور کی فضائی کیفیت کو متاثر کیا ہے، اور حکومتی اقدامات کے ذریعے کچھ علاقوں میں فضائی آلودگی کم ہوئی ہے۔ مریم اورنگزیب نے کسانوں سے درخواست کی کہ وہ فصلوں کی باقیات کو جلانے کے بجائے سپرسیڈر کا استعمال کریں۔
محکمہ ماحولیات نے بھی سموگ کی شدت کے پیش نظر سکولوں کی بندش کا نوٹیفکیشن جاری کیا، جس کے تحت نرسری سے پانچویں جماعت تک سکول 4 نومبر سے 9 نومبر تک بند رہیں گے۔
مزید چھٹیوں کے بارے میں فیصلہ 9 نومبر کو کیا جائے گا۔ حکومتی ہدایات کے تحت شہریوں کو غیر ضروری طور پر گھروں سے باہر نہ نکلنے کی نصیحت کی گئی ہے۔
