راولپنڈی : بھارتی جاسوس کلبھوشن یادیو کی گرفتاری کو 9 سال مکمل ہوگئے ہیں، جسے پاکستان کے سکیورٹی اداروں نے 2016ء میں بلوچستان کے علاقے ماشکیل سے گرفتار کیا تھا۔ کلبھوشن یادیو کی گرفتاری پاکستانی اداروں کی پیشہ ورانہ مہارت کا منہ بولتا ثبوت بن گئی اور بھارت کے امن کے دعوؤں کا نقاب بھی اُتر گیا۔
بھارتی بحریہ کے افسر کلبھوشن یادیو کو بھارت کی خفیہ ایجنسی ’’را‘‘ نے 2013ء میں پاکستان میں دہشت گردی پھیلانے کا ٹاسک دیا تھا۔ کلبھوشن کے اعترافات، دستاویزات اور دیگر ثبوتوں نے بھارت کے ایجنڈے کو بے نقاب کیا۔ کلبھوشن یادیو نے اپنے اعترافات میں بتایا کہ اس کا مقصد پاکستان میں فرقہ واریت کو ہوا دینا، سی پیک منصوبے کو نقصان پہنچانا، کراچی میں فرقہ وارانہ فسادات کروانا اور سندھ میں دہشت گردی کی وارداتیں کرانا تھا۔
یادیو نے ایران کے راستے پاکستان میں داخل ہونے کے بعد ’’حسین مبارک پٹیل‘‘ کے نام سے اپنا جعلی شناختی کاغذ تیار کر رکھا تھا۔ اس کیس کی گرفتاری نے پاکستان کی سکیورٹی فورسز کی صلاحیتوں کو دنیا کے سامنے اجاگر کیا اور بھارت کی دہشت گردانہ سرگرمیوں کا پردہ فاش کیا۔