لندن: روس یوکرین جنگ کے نتیجے میں عالمی مارکیٹ میں تیل کی قیمت میں مسلسل اضافہ ہو رہا ہے ، برطانوی خام تیل کی قیمت 118 ڈالر فی بیرل سے تجاوز کرگئی ہے ، جبکہ امریکی خام تیل 115 ڈالر سے زائد میں فروخت ہو رہا ہے ۔
واضح رہے کہ عالمی منڈی میں تیل کی قیمتیں مستحکم رکھنے کے لیے امریکی صدر اسٹریٹجک ذخائر سے 30 ملین بیرل تیل جاری کرنے کا اعلان کرچکے ہیں ۔
دوسری جانب عالمی مارکیٹ میں کوئلے کی قیمت بھی تاریخ کی بلند ترین سطح 300 ڈالر تک پہنچ گئی ہے جبکہ گندم کی قیمتوں میں 5 فیصد اضافہ دیکھنے میں آیا ہے جو 2008ء کے بعد بلند ترین سطح پر ہے ۔ اس کے علاوہ سونے کی قیمت بھی ایک سال کی بلند ترین سطح پر پہنچ گئی ہے جبکہ ڈالر کے مقابلے میں یورو 2 سال کی کم ترین سطح پر ہے ۔
یہاں یہ امر قابل ذکر ہے کہ وزیراعظم پاکستان عمران خان نے پیر کو قوم سے خطاب میں آئندہ بجٹ تک پیٹرول ، ڈیزل اور بجلی کی قیمتوں میں اضافہ نہ کرنے کا اعلان کیا تھا ، تاہم عالمی منڈی میں خام تیل کی بڑھتی ہوئی قیمتوں کے پیش نظر یہ وعدہ وفا کرنا خاصا مشکل ہو گا ۔